Ventar forrykande regnvêr: – Blir heftig

– I morgon blir det heftig vêr på Vestlandet, med veldig mykje nedbør, seier vakthavande meteorolog i StormGeo, Olav Krogsæter.

Enkelte stader kan få mellom 60 og 90 millimeter regn, og ut på ettermiddagen kan det også bli torevêr.

Varselet gjeld frå Rogaland i sør til Trøndelag i nord.

Vind, regn og snø

– Det blir kuling og regn over heile fjøla, og snø i fjellet. Det er sendt ut ganske mange farevarsel, seier Krogsæter.

Søndag er det oransje farevarsel for snøskred i delar av Troms og Nordland og i fleire regionar på Vestlandet.

På Vestlandet er det også mellom anna gult farevarsel for jord-, sørpe- og flomskred og regn.

– Nedbøren kjem som regn heilt opp til 1000 meter over havet. Det blir mildt, så blir det kaldt på måndag med nordavind. Då blir det snø heilt ned i fjæresteinane, seier Krogsæter.

Elles i landet blir det rolegare.

– Nord-Norge ligg nord for lågtrykket, så der blir det relativt roleg, men nokre snøbyger vil kome her og der, seier Krogsæter.

– Sør- og Austlandet får ein del vind, men ikkje noko nedbør, legg han til.

Snø på Nordvestlandet

På mandag held nedbøren fram i Møre og Romsdal og nord i Oppland, ifølgje meteorologen.

– Det kan komme ein halvmeter med snø i Møre og Romsdal og nordvest i Oppland.

Det blir også kaldare på måndag over heile landet.

– I morgon blir det relativt mildt på Vestlandet, med fem til sju plussgrader. På Austlandet blir det om lag ein grad i morgon, og i søraust blir det fem plussgrader, seier Krogsæter.

I nord vil gradestokken stort sett ligge rundt null grader, legg han til.