Dette betyr kutt i drivstoffavgifta for lommeboka

Torsdag kunngjorde regjeringa at dei vil kutte i drivstoffavgifta frå nyttår av.

– Reduserte drivstoffavgifter bidrar til å gjere kvardagen litt enklare for hushaldningar og næringsliv, seier finansminister Trygve Slagsvold Vedum (Sp).

Vil hjelpe folk flest

Mange hushaldningar har fått merke kostnadsauken på lommeboka det siste året. Høge straumprisar, renteheving og høge drivstoffprisar gjer at folk får mindre å rutte med.

Regjeringa meiner at kuttet i drivstoffavgifta er ein direkte oppfølging av regjeringens avgiftspolitikk, som har som mål å kutte i avgiftene som rammar folk flest.

Regjeringa seier i dag at drivstoffavgiftene i vegtrafikken blir redusert for folk flest med 600 millionar kroner.

Liten innverknad

– Det er jo småpengar, seier professor Frode Steen ved NHH.

Men alle monner drar, og økonomen seier at den vanlege bilist i gata vil kunne merke avgiftskuttet, litt.

– Dersom du fyller 40 liter, vil det utgjere ein stad mellom 20 og 30 kroner, seier Steen.

Likevel er det usikkert kor mykje pumpeprisen til sjuande og sist vil bli påverka.

Regjeringa aukar nemleg omsetnadskravet for biodrivstoff i vegtrafikken frå 15,5 til 17 prosent.

Ettersom biodrivstoff er dyrare enn vanleg drivstoff, kan det føre til at folk flest ikkje drar så stor nytte av avgiftskuttet.

– Auka bruk av biodrivstoff har ein klimafordel, men kan også føre til at pumpeprisane til sjuande og sist forblir dei same.

– Dieselbløff

NAF reagerer sterkt på framstillinga til regjeringa om at dagens vedtak vil hjelpe folk flest.

– Samstundes som regjeringa kuttar avgiftene, aukar dei kravet til innblanding av biodrivstoff. Det er dyrare, og dermed går det i beste fall i null for forbrukarane, seier Ingunn Handagard, pressekontakt i NAF.

Ho etterlyser klarare tale frå finansministeren, og at han legg fram meir nøyaktige tal på korleis dette faktisk vil påverke pumpeprisen.

– Vi er på ingen måte fornøgd.

Krass kritikk

Roy Steffensen i Frp er ikkje nådig i kritikken mot Vedum og dagens vedtak.

– Det er ikkje til å tru at vi har eit finansdepartement som sender ut pressemeldingar der dei villeiar folk og pressen, seier Steffensen, som kallar pressemeldinga som kom i dag for ein bløff.

Steffensen hevdar at på grunn av CO2-avgifta og endringa i kravet til biodrivstoff, så vil avgifta tvert i mot auke frå 6,73 kroner i år til 6,91 kroner neste år.

– Støre bør spørre seg sjølv om han er tent med ein finansminister som ikkje bryr seg om fakta, og som openbart slit med å bruke ein kalkulator.

– Regjeringa fjernar ei avgift

Statssekretær Lars Vangen (Sp), svarar følgjande på kritikken i ein e-post til TV 2:

– Den største endringa frå i år til neste år er at regjeringa no fjernar ei avgift i avgiftssystemet. Frå 1. januar 2023 vil dei totale drivstoffavgiftene bli redusert med ca. 2,2 milliardar kroner.

Han legg til at ein «avgiftsreduksjon på drivstoff til ikkje-veigåande maskinar blir om lag 1,56 milliardar, noko som gir ein netto avgiftsreduksjon på 138 øre per liter.»

– Avgiftsreduksjonen på drivstoff i vegtrafikken blir i overkant av 600 millionar kroner. For bensin gir dette inga endring i avgiftene, mens avgiftene på diesel til vegtrafikk netto blir redusert med 27 øre per liter, skriv han.

Regjeringa aukar også omsetningskravet i vegtrafikken og det blir innført eit omsetningskrav for biodrivstoff for ikkje-veigåande maskinar. Om dette skriv statssekretæren at «det trekkjer i motsatt retning, men storleiken på virkninga er usikker, sidan ho er avhengig av utviklinga i marknadsprisane på fossilt og biobasert drivstoff.»

Vangen skriv vidare at «samla anslås statsbudsjettet for 2023 å bidra til å redusere pumpeprisen på anleggsdiesel med 50 øre per liter.»

– Til tross for regjeringa sine avgiftsreduksjonar i drivstoffavgiftene anslås busjettet ikkje å påverke pumpeprisen for vegtrafikken i vesentleg grad.

– Pumpeprisane blir bestemt først og fremst av internasjonale maknadspriser på drivstoff, men vi sørgjer for at avgiftene i sum blir reduserte. Utan våre endringar i vegbruksavgifta, så ville prisen ha gått opp. Det er ingen tvil om at drivstoffavgiftene no blir redusert, så er det lov å meine at kutta burde ha vore enda større.