HETSAST: Spesielt reindriftssamane har blitt utsett for hets og trugslar i sosiale medium dei siste dagane..
HETSAST: Spesielt reindriftssamane har blitt utsett for hets og trugslar i sosiale medium dei siste dagane.. Foto: Skjermdump

Har starta etterforsking av samehets

Tre politidistrikt startar etterforsking av hatefulle ytringar og trugslar mot det samiske og reindriftsnæringa.

Norske Reindriftssamers Landsforbund melde denne veka ei rekke namngitte personar til politiet for hatefulle ytringar og direkte trugslar mot samar og spesielt reindriftsnæringa.

– Vi har aldri opplevd så mykje hets og sjikane mot reindrifta eller det samiske generelt, sa leiar i NRL, Ellinor Marita Jåma, til TV 2 etter at meldinga blei kjent.

«Ta å skyt reineier, da slipper du bedre ut av det enn å skyte rein», var berre ein av mange kommentarar.

TRIST: Leiar i NRL, Ellinor Marita Jåma, er både trist og oppgitt over det folk har skrive om samar og reindriftsutøvarar dei siste vekene.
TRIST: Leiar i NRL, Ellinor Marita Jåma, er både trist og oppgitt over det folk har skrive om samar og reindriftsutøvarar dei siste vekene. Foto: Heiko Junge

Den massive hetsen som har gått føre seg på sosiale medium og i kommentarfelt til redaktørstyrte medium oppstod i etterkant av ei hending i Alta der ein reineigar skal ha skoten ein hund som angiveleg jaga rein. Den saka er også til etterforsking hos politiet i Finnmark. To personar er mistenkte.

Kan risikere bøter

Det er Finnmark politidistrikt, Innlandet politidistrikt og Sør-Øst politidistrikt som etterforskar sakene.

Av dei 20 personane Jåma melde til politiet, ligg to av sakene hos politiet i Finnmark. Ifølge seksjonsleiar for felles etterforsking, Kenneth Nilsen, er det to menn i 40-åra frå Vest-Finnmark som blir etterforska.

– No innhentar vi informasjon og skal gjennomføre avhøyr, og så håpar vi å kunne sluttføre sakene i løpet av 14 dagar, seier Nilsen.

Saker som går på hatefulle ytringar eller trugslar blir jamnt og trutt etterforska av politiet i Finnmark, ifølge Nilsen. Men han ønsker ikkje å trekke dei sakene opp mot det samiske.

– Det med hatefulle ytringar på nett er eit generelt samfunnsproblem, seier Nilsen.

ETTERFORSKAR: Seksjonsleiar i Finnmark politidistrikt, Kenneth Nilsen, etterforskar no samehetsen.
ETTERFORSKAR: Seksjonsleiar i Finnmark politidistrikt, Kenneth Nilsen, etterforskar no samehetsen. Foto: Jan Morten Bjørnbakk/Scanpix

I tillegg til sakene NRL og Jåma melde inn har også to enkeltpersonar meldt inn det dei meiner er trugslar og hatefulle ytringar til politiet i Finnmark.

Sør-Øst politidistrikt har mottatt ei av sakene som Jåma melde inn, og den er no under etterforsking, ifølge politiadvokat Line Pettersen.

– Heilt klart straffbare

Jåma har vore leiar for NRL i sju år, og aldri opplevd liknande.

– Det er det verste eg har handtert. Eg har aldri opplevd noko på dette nivået her, seier Jåma.

Ifølge Nilsen er nokre av dei ytringane som har kome i samband med denne saka heilt klart straffbare.

– Det er beklageleg at enkelte går til det skrittet og skriv så mykje stygt om både samar og reindriftsutøvarar, det er ikkje bra, seier Nilsen.

Relatert