Ordførar Gunnar Wilhelmsen meiner kompensasjonen helseministeren lova under pressekonferansen ikkje er meir enn symbolsk.
Ordførar Gunnar Wilhelmsen meiner kompensasjonen helseministeren lova under pressekonferansen ikkje er meir enn symbolsk. Foto: Rune Stoltz Bertinussen

Tromsø-ordførar vil ikkje ha nasjonale tiltak

– Eg meiner vi må kunne styre desse tiltaka sjølve, seier Tromsø-ordførar Gunnar Wilhelmsen.

Ordførar i Tromsø, Gunnar Wilhelmsen (Ap), reagerer på at tiltaka helseminister Bent Høie (H) la fram på pressekonferansen tysdag skal gjelde nasjonalt.

– Eg meiner at vi må kunne styre desse tiltaka sjølve, seier Wilhelmsen.

Det er mindre enn ein månad sidan Tromsø hadde eit større utbrudd av den britiske mutasjonen, men som kommunen klarte å bekjempe ved hjelp av lokale tiltak.

Eit av dei nye tiltaka som blir innført er nasjonal skjenkestopp. Wilhelmsen meiner det er feil at utelivsbransjen og hotellnæringane i dei kommunane utan smitte også skal bli skadelidande.

– Alt for lite midlar

Som plaster på såret lova også Bent Høie 500 millionar kroner ekstra til kommunane i revidert nasjonalbudsjett. Spesielt peika han på utelivsbransjen og hotellnæringa som blir hardt ramma av dei nye tiltaka. Det ligg allereie 750 millionar kroner i potten som kan brukast av kommunar til å kompensere lokale bedrifter.

Wilhelmsen meiner summen er alt for låg.

– Dei stenger ned reiselivsnæringa i ein toppsesong for oss. Dette vil få konsekvensar langt utover desse næringane også, seier Wilhelmsen og viser blant anna til fiskerinæringa som vil få problem med å levere fisk til restaurantnæringa dersom kundane uteblir.

– Den summen er symbolsk, det blir ingenting. Det er alt for lite midlar til å kompensere, spesielt for oss som blir så hardt ramma, seier Wilhelmsen.

Relatert