Opel Rallye Kadett: Sigrid har eid sin klassiker i 45 år!
- Det er ikkje mange av disse på vegen lenger, smiler den stolte eieren.
I 1995 hamna Sigrid Rismyr Svalastog frå Grungedal i bladet «Vi menn». Ikkje som midtsidemodell, men ved å vise fram sin sjeldne 67-modell Opel Rallye Kadett, skriver Ta.no.
Grunnen til at bilen hennar hamna i ein artikkel i «Vi menn» var at vekebladet hadde laga ein presententasjon av ulike Opel-modellar. Då Sigrid blei merksam på at dei hadde gløymt å presentere Rallye-modellen ho sjølv hadde ståande i garasjen, kontakta ho redaksjonen i bladet, som raskt retta opp bommerten ved å laga ei eiga sak på bilen hennar.
Kortdistanse
- Eg har ikkje rekt å vaske han inni enno altså, orsakar Sigrid.
Det er andre gongen i vår at ho køyrer bilen ut av garasjen der han har stått lagra gjennom ein lang vinter.
- Sjå. Sambygdingen min, Øyvind Kili, har pussa opp felgane. Blei dei ikkje bra?
Sigrid opnar opp døra på førarsida. Bak rattet i teak syner panelet ein kilometerstand på 159.748.
- På 45 år?! Snakkar me for det meste kjipp-køyring her, eller?
Sigrid ler.
- Stort sett det, ja. Bortsett frå ein tur til Sverige, ein til Trondheim og nokre turar til Oslo.
Ho set seg bak rattet.
- Og sjølvsagt ein del turar til Skien. Elles har bilen berre gått innanfor Vinje kommune, ja.
Ho smiler, blunkar lurt og fortel at ho har køyrd til mang ein dansefest i byen.
- På tidleg 70-tal og framover var det skikkeleg uteliv i Skien. Herremann, så moro me hadde det, mimrar dama som er open om det meste. Bortsett frå ein ting.
- Du må ikkje skrive kor gamal eg er i avisa altså.
- Gjer det noko då, så godt som du held deg?
Sigrid tenkjer litt.
- Okei då. Du kan skrive at eg er fødd i 1928. Så kan folk rekne sjølve, seier ho med glimt i auga.
Bildilla
- Har du sett dette då?
Sigrid smiler lurt og nikkar mot merket på dashbordet medan ho smetter eit par velstelte hendar inn i køyrehanskane.
«Forbudt å kysse føreren når bilen er i gang».
Interessa for bil har Sigrid hatt sidan ho var ung jente.
- Eg var ei sportsjente då au ser du, smiler ho og set nykelen i tenninga.
På sommaren dreiv foreldra hennar med gardsturisme. Ein dag køyrde ein låg, knallraud sportsbil inn på tunet.
- Trur eg var femten-seksten år. Eigaren gav meg lov til å sitje bak rattet og starte bilen. Då var det gjort, fortel ho og ler.
I 1956 reiste ho så til Skien for å ta sertifikat.
- Eg hadde køyrd mykje med både bror min og vener, så det var ikkje mange timane eg trong, smiler ho.
Etter å ha seld tømmer som ho fekk av far sin, hadde Sigrid nok pengar til å kjøpe sin fyrste bil i 1957 – ein mørkeblå Volvo PV til 19.500 kroner. Etter 10 år bytte ho PV’n inn i den sylvgrå sportsbilen ho nett har sett seg inn i.
- Skulle eg bytt bil, så ville eg hatt akkurat maken til den eg har no. Men det er plent umogeleg å få tak i, så då får eg berre behalde den eg har, smiler ho.
- Reparerer du bilen sjølv, eller?
- Å nei, nei. Eg ser berre på utsjånaden eg, svarar Sigrid kjapt, medan ho manøvrerar bilen i rett posisjon for fotografering.
Les flere bil- og motorsaker fra ta.no her:
Les også: Opel GT - dette var Rallye-Kadettens smekre storesøster
