BEIST: Sun Yang etter 400 meter fri i London. Eit av to gull i det OL. FOTO: LEHTIKUVA / Heikki Saukkomaa
BEIST: Sun Yang etter 400 meter fri i London. Eit av to gull i det OL. FOTO: LEHTIKUVA / Heikki Saukkomaa Foto: Heikki Saukkomaa

Eit beist, ein helt og doparar: Tidenes sterkaste startfelt skal få jobbe hardt om dei skal knuse Christiansens finaledrøm

For det er ingen grunn til å tvile på Henrik Christiansen før Rio-OL.

Denne artikkelen er over ett år gammel, og kan inneholde utdatert informasjon.

Sjå innleiande heat, svømming, på TV 2 Sportskanalen og Sumo kl. 18.00. Finalar på TV 2 frå kl. 03.00.

Ca. klokka 19.18 laurdag gjer Henrik Christiansen sin olympiske seniordebut når han stuper uti heat 6 av dei innleiande heata, på svømmespråket kalt forsøk, på 400 meter fri.

Det er ingen grunn til å tvile på at det kjem til å gå bra.

Christiansen har takla alle utfordringar han har møtt så langt i karriera, og 19-åringen har den eigenskapen som veldig mange av dei best idrettsutøvarane har:

Han trivast og hevar prestasjonane litt ekstra når det gjeld som mest.

Det er befriande å sjå han spøke og le med TV 2 og andre norske medier på pressetreffet to dagar før det brakar laust. Det er det moduset han skal vere i for å prestere best mogleg.

– De har kondom-dispensere i matsalen

Det er kult å sjå at han nærast lovar personlig rekord. At han er så sikker på jobben som er gjort at han forventar å svømme fortare enn kva han nokon gong har gjort før.

Svømming er på ein måte greit slik. Til skilnad frå til dømes friidrett blir det aldri noko lureløp. Bassenget er 50 meter langt, og tilhøva i internasjonale toppbasseng er relativt like. Svømmer du ei betre tid enn du nokon gong har gjort før, har du gjort din beste prestasjon nokonsinne.

Somme av dei beste prøvar kanskje å spare litt av kreftene til finalen og svømme litt saktare enn kva dei eigentlig kan, men likevel nok til å ta seg vidare. Men for Henrik Christiansen sin del vil det handle om ein ting skal han nå det uttalte målet om ein finaleplass: å svømme eit så optimalt løp i det innleiande heatet som mogleg.

Svømmer han under 3.46,37 vil han, trenar Ronnie Anstensen, og landslagssjef Petter Løvberg vere nøgd. Det er vanskelig å utsette noko på det.

Samstundes trur eg at dersom han setter personleg rekord, og gjerne svømmer ned på 3.45-talet, så vil det holde til ein plass blant dei åtte som får finaleplass. Vi skal hugse på at tida hans frå Swim Open Stockholm hadde holdt til tredjeplass i forsøket, og femteplass i finalen, i London.

Når det er sagt er Henrik Christiansen på papiret opp mot det tøffaste selskapet med 400 meter fri-svømmarar nokonsinne. Svømmegiganten SwimSwam har ikkje ein gong nemnd nordmannen i sine førehandsomtaler om potensielle finalekandidatar.

Det same gjeld for øvrig 1500-meteren seinare, der Christiansen er opp mot mange av dei same utøvarane. Det er sjølvsagt eit feilgrep og ei undervurdering av årets EM-sølvmedaljør, men fortel vel så mykje om årets langdistanse-frifelt i bassenget. Det vil kreve noko heilt spesielt å gå til finalen i dag.

Så kven er desse som kan nekte Henrik Christiansen finaleplassen vi i Norge trur på?

Sun Yang (24), Kina
Eit beist av ein svømmar, som er Henrik Christiansens rake motsetning i bassenget. Ein enorm fysikk, kombinert med ein uovertruffen teknikk som gjer at det ser ut som han tar søndagsbadet medan han svømmer frå alt og alle, i tillegg til ei mørk side som tar han det vesle steget ekstra.

Sun er regjerande olympisk meister på begge Henrik Christiansen sine øvingar, men tida etter OL i London har vore turbulent for mannen som er superstjerne i Kina. Havna i strid med trenarane på grunn av eit kjæresteforhold og blei utestengt frå treningane.

Krasja ein bil han køyrde utan førarkort, og har også blitt tatt i doping – tremånaderstraffa han fekk var sona ferdig før det i det heile tatt blei offentliggjort. Under fjorårets VM blei han skulda for å angripe ei brasiliansk svømmar under oppvarming, og uteblei også frå 1500-meterfinalen, angivelig på grunn av hjertetrøbbel.

Mack Horton (19), Australia
Supertalent som er jamnaldrande med Henrik Christiansen. Årsbeste i verda i år, fem sekunder bedre enn tida til Henrik frå Swim Open Stockholm, som den gongen var årsbeste i verda. Horton har tydeligvis skremt tidlegare nemnde Sun Yang, for før leikane startar har australske trenarar anklaga Sun for å prøve å plage Horton og få 19-åringen ufokusert, blant anna gjennom å sprute vatn på han.

Fekk fjorårets VM øydelagd av ein parasitt som gjorde at han gjekk ned fem kilo, men i år blir denne karen svært vanskelig å stoppe. Brukar bilder av verdas beste langdistansesvømmarar som motivasjon i daglig trening, ikkje ulikt Henrik Christiansen. Min OL-favoritt - på 400 meter fri.

KNYTTAR NEVEN: Mack Horton under det australske OL-uttaket. FOTO: AFP PHOTO / David Mariuz /
KNYTTAR NEVEN: Mack Horton under det australske OL-uttaket. FOTO: AFP PHOTO / David Mariuz / Foto: David Mariuz

Park Tae-hwan (26), Sør-Korea
Ein eminent svømmar med eit eminent beinspark som si forse. Det såg lenge ut som gullvinnaren frå Beijing 2008, den første koreanske gullmedaljen i svømming nokonsinne, og sølvvinnaren frå 2012 ikkje skulle få lov til å stille i Rio. Ei positiv dopingprøve i 2014 medførte ei 18 månader lang utestenging.

Den var ferdig sona i mars i år, men ein sær-koreansk regel holdt han ute frå OL – inntill han klaga saka inn til idrettens voldgiftsdomstol, CAS. CAS slo fast at Park hadde sona ferdig dommen, og at sørkoreanarane ikkje kunne halde han vekke om han var kvalifisert. Akkurat det er det ikkje tvil om at han er, og hans inntreden i leikane gjorde vegen til finale litt tøffare for Henrik Christiansen.

James Guy (20), Storbritannia
Guy blei i fjor den første britiske herresvømmaren til å vinne ein fridistanse i eit verdsmesterskap nokonsinne då han tok rotta på konkurrentane på 200 meter fri. Tok sølvet på 400 meter fri den gongen, bak Sun Yang.

James Guy med gullmedaljen frå VM i Kazan. FOTO: NTB scanpix.
James Guy med gullmedaljen frå VM i Kazan. FOTO: NTB scanpix. Foto: Michael Sohn

Ein geniun good Guy og ein kul fyr, som under EM i mai stilte opp ubarbert og berre i gamaldags badebukse (speedo) på 400 meter fri, berre for å demonstrere at han var i tung trening. Det gjekk fryktelig sakte, men det er ingen grunn til å tru at briten vil spare på krutet, eller barberskummet, denne gongen.

Gabriele Detti (21), Italia
Har etterkvart blitt ein av Henrik Christiansens erkerivalar. På begge nordmannens seniormedaljer har Detti vore på plassen foran. Då Christiansen tok bronse på 1500 meter fri i kortbane-EM før jul tok Detti sølv. Då Christiansen tok sølv på 400 meter fri i langbane-EM i mai tok Detti gull.

Ein slepen teknikar med kombinasjonen av ein uthaldande motor og evne til fart som dei fleste misunner han. Detti trenar i det råaste miljøet i verda akkurat no, saman med 1500-fenomenet Gregorio Paltrinieri, eit miljø Christiansen har uttalt at han kunne tenkt seg å vitje for å lære ein gong etter OL.

Connor Jaeger (25), USA
Slo gjennom som reindyrka 1500-metersvømmar, det var det han svømte i London, men har etablert seg blant eliten på 400 meter også dei seinare åra.

Minnar kanskje litt om Henrik Christiansen i den forstand at han nok i utgangspunktet manglar den heilt store toppfarta som til dømes Sun Yang, Park Tae-hwan og Gabriele Detti potensielt kan få opp. Må satse på å male konkurrentane i stykker.

CON(N)OR: Dwyer og Jaeger etter å ha kvalifisert seg til OL-laget på 400 meter fri.  Tom Pennington/Getty Images/AFP
CON(N)OR: Dwyer og Jaeger etter å ha kvalifisert seg til OL-laget på 400 meter fri.  Tom Pennington/Getty Images/AFP Foto: Tom Pennington

Conor Dwyer (27), USA
Dwyer er nok nærmare den andre kategorien enn navnebror Jaeger. 27-åringen har også kvalifisert seg som ein av to amerikanarar til halve øvinga: 200 meter fri. Det borgar for at Dwyer har ein god del fart i seg.

Det kan potensielt utnyttast på to måtar: anten ved å distansere konkurrentane frå start og halde unna, eller holde igjen i starten og forsøke å ta det på dei siste meterane. Forvent å sjå Dwyer gjere det siste.

Florian Vogel (21), Tyskland
Tyskland som svømmenasjon ligg nede med ryggprolaps, men Vogel er eit av lyspunkta i eit mannskap som ikkje liknar på den stormakta landet ein gong var. Vogel har hatt ei voldsom utvikling siste året, og med ei tid under 3.45 i det tyske uttaksstevnet til OL har Vogel etablert seg som ein verkelig finalekandidat i Rio. Tida var nesten tre sekunder bedre enn han gjorde i VM i fjor.

Vogel er elles mest kjend for å vere svømmaren som redda livet til ei dame som datta i elva Isar utanfor München i juni 2015. Vogel deltok på ein fotoshoot då han istaden måtte nytte svømmedugleiken til noko heilt anna. Ein vaskeekte helt!

SVØMMAR: Florian Vogel (i midten) ligg dårlig an på 800 meter fri i VM i Kazan her. Han er i bedre form no. T.h Damien Joly, t. v: Marc Sanchez. FOTO: AFP PHOTO / FRANCOIS XAVIER MARIT
SVØMMAR: Florian Vogel (i midten) ligg dårlig an på 800 meter fri i VM i Kazan her. Han er i bedre form no. T.h Damien Joly, t. v: Marc Sanchez. FOTO: AFP PHOTO / FRANCOIS XAVIER MARIT Foto: Francois Xavier Marit

Wojciech Wojdak (20), Polen
Wojdak og Henrik Christiansen har allerede hatt mange duellar. Som 96-modellar i Europa har desse to møtt kvarandre mange gongar før. Wojdak tok gullmedaljen då Christiansen tok sølv på 400 meter fri under junior-EM for to år sidan.

KVA BLEI TIDA? Wojciech Wojdak sjekkar resultata under VM i Kazan. FOTO: AP Photo/Sergei Grits
KVA BLEI TIDA? Wojciech Wojdak sjekkar resultata under VM i Kazan. FOTO: AP Photo/Sergei Grits Foto: Sergei Grits

Den godaste Wojdak har imidlertid ein svakheit som han verkar til å slite med å bli kvitt: Han brukar sprengåpne, for deretter å stivne fullstendig. Gjer han det i Rio er det godt nytt for Henrik.

Akram Ahmed (19), Egypt
Ein annan av Henrik Christiansens nemesisar frå junioralder. Akram Ahmed vant 800 meter fri under ungdoms-OL i Nanjing, berre nokre månader etter det tidlegare nemnde junior-EM. På den øvinga blei Christiansen nummer tre.

Sidan har det vore litt stille rundt Ahmed, som no studerar i USA ved South Carolina University. Resultata i den amerikanske collegesesongen, der dei konkurrerer på i 25 yards-basseng, har imidlertid vore så gode, at mange ventar seg store ting av Ahmed.

PS: Den tredje av Christiansens store rivalar frå ungdomstida, ukrainske Mikhailo Romantsjuk som imponerte i langbane-EM i mai, svømmer berre 1500 meter fri i OL.

Nokre andre potensielle og sannsynlege finalistar:
Ryan Cochrane (Canada), Velimir Stjepanovic (Serbia), Peter Bernek (Ungarn), Stephen Milne (Storbritannia), David McKeon (Australia), Felix Auböck (Østerrike), Maarten Brzoskowski (Nederland).

Men det viktigaste å hugse på: På startlistene er kanskje ikkje Henrik Christiansen blant dei som skal svømme finale i OL i Rio, men det er resultatlistene som teller...