Denne artikkelen er over ett år gammel, og kan inneholde utdatert informasjon.

Seks år er gått sidan 19 år gamle Zoliswa Nkonyana, på brutalt vis, blei drepen.

I oktober blei fire menn kjent skuldig i å ha tatt livet av den sør-afrikanske kvinna. Onsdag blei dei dømt til 18 års fengsel.

Zoliswa Nkonyana levde som opent homofil. Domstolen i Cape Town la til grunn at dei fire menna drap Nkonyana fordi ho levde opent som lesbisk, ifølgje BBC.

Nkonyana blei skubba, sparka og stukke til døden, få meter frå heimen sin i Khayelitsha, ein bydel i Cape Town.

Ikkje tvil om motivet

Nkonyana blei steina og stukke ni gongar i februar 2006. Retten meinte det ikkje var tvil om at det var hat og homofobi som var motivet for drapet.

Dommen blir sett på som eit signal om at om at vald basert på seksuell orientering ikkje vil bli tolerert, ifølgje nyheitsbyrået South African Press Association.

Utanfor rettslokalet i Cape Town, blei dommen feira med dans og jubel.

Les også:David kan få dødsstraff fordi han er homofil

– Blir ikkje beskytta nok

Lesbiske kvinner i Sør-Afrika blir ofte angripe av menn som forsøkjer å «kurera» dei for sin seksuelle legning, ifølgje AFP. Fenomenet blir kalla «korrigerande valdtekt».

For tre år sidan blei ein mann dømd til fengsel på livstid, ein annan mann fekk 32 år bak murane for valdtekt, ran og drap på ei lesbisk kvinne.

FNs generalsekretær Ban Ki-moon ankommer toppmøtet i Den afrikanske union i Addis Abeba. (Foto: Scanpix)

Verdssamfunnet har reagert mot homofile sine kår i Sør-Afrika og andre afrikanske land.

Søndag kom FNs generalsekretær Ban Ki-moon om ei oppmoding til afrikanske leiarar om at dei respekterer homofile sine rettar.

Les også: – Over 100.000 homofile muslimer diskrimineres

I talen, under opninga av toppmøtet i Den afrikanske union (AU) i Addis Abeba, sa Ban at diskriminering basert på seksuell legning og kjønnsidentitet i altfor lang tid er blitt ignorert i mange land.

Les meir: – Afrika må respektere homofiles rettigheter

I desember la Human Rights Watch fram ein rapport der dei skuldar Sør-Afrika for å ikkje gjera nok for å beskytta lesbiske og transkjønna mot angrep mot dei.