SOVNA: Navigatøren innrømmer å ha sovna på vakt. Ferja enda på grunn. (Foto: MMS/Lesarfoto)
SOVNA: Navigatøren innrømmer å ha sovna på vakt. Ferja enda på grunn. (Foto: MMS/Lesarfoto)

Navigatøren sovna på vakt, ferja gjekk på grunn

Menneskelig feil, ikkje teknisk, er årsaken til at ferja MF «Sogn» gjekk på grunn på fredag.

Det melder NRK Hordaland. Avisa skriv av navigatøren vakna like før ferja køyrde rett inn i fjøresteinane på strekka mellom Bruravik og Brimnes, fredag morgon.

Det var i eit skipsavhøyr det kom fram at navigatøren sovna.

13 passasjerar om bord

– Me har fått klarlagt dei faktiske forholda, og kan slå fast at det er menneskelige feil, og ikkje tekniske årsaker som gjorde at ferja gjekk på grunn. Den ansvarlige navigatøren har forklart at han sovna, seier administrerande direktør Stig Kristoffersen i Fjord1 til NRK.

LES OGSÅ: Ferge gikk på grunn i Hordaland

Ferja «Sogn» var omtrent 200 meter frå kaien då ulykka skjedde.

13 passasjerar var om bord, men ingen av dei vart skadd.

Fjord1 seier at alle bestemmingar om kviletid var oppfylt.

Store skader

– Dette er sjølvsagt heilt uakseptabelt, og ikkje noko me kan godta. Me er veldig opptatt av at vårt mannskap er godt utkvilt, og det er berre å beklaga at våre passasjerar har vore utsett for dette, seier Kristoffersen til NRK.

Han seier til Bergens Tidende at alkohol var heller ikkje inne i biletet.

Ferja fekk store skader, og Fjord1 reknar med at det vil gå lang tid før ferja er i drift igjen. I mellomtida er det redusert kapasitet på sambandet.