Politiet fann 50 ulovlege våpen i bustadhus

Det var våpen i omtrent alle rom, ifølgje politiet.

Denne artikkelen er over ett år gammel, og kan inneholde utdatert informasjon.

Det er Avisa Nordland som skriv dette.

Ifølgje avisa fann politiet ei rifle, to haglegevær, ein pistol, seks luftpistolar, 37 luftgevær, ein harpun, tre slaktemasker, ein armbrøst og ein pilboge i bustadhuset i Fauske.

Då mannen som bur i huset blei pågripen, fann politiet tre luftvåpen i bilen hans.

Fekk forbod

51-åringen har ikkje løyve til å ha våpen, korkje registreringspliktige eller registreringsfrie. I 1996 fekk han forbod mot å ha våpen og ammunisjon og ein ny søknad frå mannen blei avslått i 2000, skriv avisa.

Alle våpna som blei funne hjå mannen, skal han ha skaffa til vege etter avslaget i 2000.

Saka var oppe i Salten tingrett onsdag. Politiadvokaten bad om at mannen blir dømd til 60 dagars fengsel og at alt heile arsenalet blir inndrege.

Ber om frifinning

Sjølv meiner mannen seg umyndiggjort. Han seier også at han ikkje har lagt skjul på at han har hatt våpen og at han har søkt utan å få svar på søknad, men han vedgår at våpna ikkje har vore sikra på ein god nok måte.

Forsvararen meiner at mannen må frifinnast.

– Han har ikkje lagt skjul på at han har samla våpen. Han har ikkje fått svar på fleire av søknadene sine om løyve og har då trudd alt var greitt, meiner forsvararen.