SYKEHUSSTRID: Nordmøringane er redde for at sjukehuset i Kristiansund skal bli bygt ned dersom planane om nytt sjukehus i Molde blir noko av. (Foto: TV 2 )
SYKEHUSSTRID: Nordmøringane er redde for at sjukehuset i Kristiansund skal bli bygt ned dersom planane om nytt sjukehus i Molde blir noko av. (Foto: TV 2 )

Sjukehuskrig mellom Molde og Kristiansund

I løpet av våren kjem regjeringa til å avgjere kvar det nye sjukehuset for Romsdal og Nordmøre skal ligge. Romsdalingar og nordmøringar har gått i skyttergravene.

Denne artikkelen er over ett år gammel, og kan inneholde utdatert informasjon.

Statssekretær Roger Ingebrigtsen i Helse- og omsorgsdepartementet fekk føle at partane har gått i skyttergravene då han vitja sjukehusa i Molde og Kristiansund i dag. Nordmøringane er redde for at sjukehuset i Kristiansund skal bli bygt ned dersom planane om nytt sjukehus i Molde blir noko av. Derfor presenterte dei planar for oppgradering av sjukehuset i Kristiansund til 735 millionar kroner.

Klassisk krig

– Dette blir ein klassisk krig mellom to fogderi, men det er ein utruleg viktig krig, seier ordføraren i Kristiansund, Per Kristian Øyen (Ap), til Tv 2. Han fryktar at akuttfunksjonen ved sjukehuset i Kristiansund blir nedgradert. Det set han seg kraftig imot og viser til at dei er ein viktig del av beredskapen for oljeplattformane i heile Norskehavet.

Molde ordføraren reagerer skarpt på utspelet frå Per Kristian Øyen.

– Eg synes det er forferdeleg leit at han kallar dette ein krig. Vi har ikkje gjort noko mot Kristiansund i denne saka, og held oss til det helseminister Bjarne Håkon Hansen lova så seint som i 2009, nemleg at det skal byggjast nytt sjukehus på Eikrem fem seks kilometer frå Molde sentrum, seier Molde-ordførar Jan Petter Hammerø (H) til Tv 2.

Avgjerast i vår

Nordmøringane går inn for at det nye sjukehuset til om lag 2,5 milliardar kroner skal byggjast på Batnfjordsøra – midt i mellom dei to byane. Statssekretær Roger Ingebrigtsen seier saka kjem til å bli avgjort i vår.

– Dersom krigen mellom dei to kjem pasientane til gode så er eg for krig, men han kan ikkje vare for lenge. Det er på tide at statsråden skjer igjennom og det kjem til å skje i løpet av våren, seier han til Tv 2.

Regjeringa har eit hundreårs perspektiv når det nye sjukehuset skal byggjast. Dei må sjå på kva pasientar dei skal tene dei neste hundre åra, og det kjem til å bli avgjerande for kva alternativ som blir valgt.

Nære band

Tv 2 er blitt kontakta av fleire som spekulerer i at nære band mellom arbeidarpartistyrte Kristiansund og regjeringa vil påvirke kva statsråden bestemmer seg for.

– Vi vil at alle skal bli høyrt i denne saka. Pasienten er vår viktigaste lobbyist. Det er han vi tenkjer på når vi skal finne ei sjukehus-løysing for Nordmøre og Romsdal, seier statssekretær Roger Ingebrigtsen til Tv 2.