Fish and chips

Oppskrift : Arne og Ømjer Hjeltnes

Kunsten med å laga mat er å få alt ferdig på same tid. Difor er det lurt å laga poteten fyrst. Etter dei er ferdige held dei seg godt i varmeskåp eller i komfyren på 80–90 grader.

Skjær dei store potetene i tjukke pinnar, vend dei i olje og steik dei i ei steikepanne til dei vert brune og sprø på utsida.

Du kan gjerne grilla dei i komfyren òg. Pass på å snu dei.

Viss du steiker dei i panna, kan du legga dei i ovnen på moderat varme 100–120 grader til fisken er ferdig fritert.

Tempura-fiskepinnar:

Lag tempurarøre ved å blande kveitemjøl, maisennamjøl, fløyte, bakepulver og egg saman til ein fint piska røre.

Skjer torsken mot kjøtretninga i avlange bitar, gjerne litt store 75–100 g. Dei kan vera lange og tynne eller stutte og breie. Nett som oss menneske.

Varm opp rapsolje i ei jerngryte. Det bør vera nok olje til at bitane kan duppa litt rundt, slik at du lett kan snu dei. Pass godt på. Frityr må gjerast av vaksne. Ikkje ha i for mange bitar om gongen. Temperaturen må vera høg for at bitane skal verta sprø og solbrune. Synes du det tek lang tid før bitane ser bra ut, må du auka varmen.

Fyrst rullar du torskebitane på ein tallerk med litt maisennamjøl. Så dyppar du dei i tempurarøra. Dukk dei skikkeleg. Friter dei så i varm olje til dei er ljosebrune og fine. Ta dei opp av gryta og legg dei på litt matpapir eller kjøkkenpapir.

Lag eit kremmarhus av avispapir, set det i eit stort glas, legg eit par store fiskepinnar og tre-fire potetbitar i kvar. Legg ein liten sitronbåt på toppen.

Set fram eit par skåler med god dipp. Remulade eller tartarsaus er godt. Småungar likar ketsjup.