Norske forbrenningsanlegg kan bli fyrte med olje

Avgifta på norsk søppel må fjernast fordi avgiftsfrie svenskar utkonkurrerer norske forbrenningsanlegg i kampen om råstoffet.

Det meiner Siri A. Meling frå Høgre som tek saka opp i spørjetimen i Stortinget onsdag.

Søppelkolonne til Sverige

20.000 vogntog årleg med norsk søppel til Sverige. Det kan bli resultatet dersom den norske søppelavgifta ikkje blir fjerna.

LES OGSÅ: Nordmenn på søppeltoppen

Svenskane tek vekk avgifta neste haust og forhandlar alt no kontrakter med norske leverandørar av søppel. Norske forbrenningsanlegg har tapt store kontrakter og må sjå seg om etter andre brenselkjelder for å kunne levere fjernvarme til kundane sine.

Må fyre med olje

Tafjord Kraftvarme i Ålesund har tapt kontrakter og ventar å tape fleire.

– Vi klarer ikkje å konkurrere med svenskane når vi må betale 100 kroner pr. tonn i avgift til staten, seier dagleg leiar Odd Helland i Tafjord Kraftvarme til TV 2 Nyhetene.

Dei må fyre med olje dersom alt søppelet forsvinn til Sverige for å oppfylle kontraktene om levering av fjernvarme til store delar av Ålesund.

Opp i spørjetimen

Stortingsrepresentant Siri A. Meling frå Høgre tek saka opp i spørjetimen i morgon.

– Høgre meiner avgifta må fjernast. Det er lite miljøvenleg å sende 20.000 trailerlass med norsk søppel til Sverige. Norsk søppel bør brennast i Norge, seier Meling til Tv2.

Ho stiller også spørsmål om økonomien.

– Her har staten støtta bygginga av norske fjernvarmeanlegg med to milliardar kroner for å bygge ut miljøvenleg energi. Då er det dårleg økonomi og lite miljøvenleg å oppretthalde ei avgift som gjer at desse anlegga taper kampen om råstoffet, seier Siri A. Meling som stiller spørsmål til Miljøvernminister Erik Solheim i spontanspørjetimen onsdag.